സന്തുഷ്ട കുടുംബം അഥവാ സ്നേഹത്തിന്റെ മേൽവിലാസം

രാവിലെ ഉണരുമ്പോൾ അടുക്കളയിൽനിന്ന് ഒഴുകിവരുന്ന കാപ്പിയുടെ മണവും കുട്ടികളുടെ ചിരിയും അമ്മയുടെ വിളിയും ചേർന്ന ഒരുത്സാഹക്കാഴ്ച – പലരുടെയും മനസ്സിൽ ഇങ്ങനെ ഒരു ദൃശ്യത്തെക്കുറിച്ചു സ്വപ്നം ഉണ്ടാകാറില്ലേ? 

കാലം മാറുകയും കുടുംബത്തിന്റെ രൂപവും ഭാവവും നവീകരിക്കപ്പെടുകയും ചെയ്യുമ്പോഴും ആഴത്തിലുള്ള ആ സ്വപ്നം മാത്രം ഇപ്പോഴും ഒരുമാറ്റവുമില്ലാതെ ഉള്ളിൽ വളരുന്നുണ്ട്. പക്ഷേ, ആഴത്തിലുള്ള ആ സ്വപ്നം — ‘ഒരുമിച്ചുള്ള സന്തോഷം’ — അതിന്റെ പ്രസക്തി ഇന്നും നിലനിൽക്കുന്നു.

ഇന്നത്തെ സമൂഹത്തിൽ കുടുംബം ഒരു അനുഭവമാണെന്ന് വിലയിരുത്താം. രക്തബന്ധത്തിനപ്പുറത്ത്, മനസുകൊണ്ട് ചേർന്നവരും പരസ്പര വിശ്വാസം വളർത്തിയവരുമായ ഒരു കൂട്ടായ്മയെക്കൂടി കുടുംബമായി നാം ഇന്ന് പരിഗണിക്കുന്നു. പരമ്പരാഗത കുടുംബ മാതൃകയ്ക്കപ്പുറത്തേക്ക് വളർന്നുകഴിഞ്ഞ സങ്കൽപം. എന്നാൽ ഏത് രൂപത്തിലായാലും കുടുംബം എന്നാൽ അത് സ്നേഹത്തിന്റെ മേൽവിലാസമാണ്.

പക്ഷേ, സന്തോഷം നിറഞ്ഞ ഒരു കുടുംബം സ്വാഭാവികമായി ഉണ്ടാകുമോ? ഇല്ല. അത് കഠിനാദ്ധ്വാനവും ധൈര്യവുമുള്ള ഒരു യാത്രയാണ്. ഓരോരുത്തരും ബോധപൂർവം നടത്തേണ്ട യാത്ര. ചിരി പകരേണ്ട സമയത്ത് ചിരിക്കുക, പരിഗണന നൽകേണ്ട സമയത്ത് കൈ ചേർക്കുക, മറവിയിലായ ആളെ തേടി പോകുക. ഏറ്റവും പ്രധാനമായി, സ്നേഹവും പ്രണയവും പ്രകടിപ്പിക്കുക.

മലയാളത്തിലെ പഴയകാല സിനിമകളിലോ നോവലുകളിലോ നമ്മൾ കണ്ടതുപോലെ — നീണ്ട വലിയ കോലായയിൽ എല്ലാവരും ചേർന്നിരുന്നു കഴിക്കുന്ന അത്താഴം. പിന്നെ കഥകളും ചിരികളുമുള്ള വൈകുന്നേരങ്ങൾ. അത്രയും ലളിതമായിരുന്നു അന്നൊക്കെ കുടുംബത്തിലെ സന്തോഷത്തിന്റെ മുഖം. ഇന്ന് ജോലിത്തിരക്കുകളുടെയും അടച്ചുതീർക്കേണ്ട ബാധ്യതകളുടെയും തിരക്കിൽ, മുഖത്തെ ചിരി പോലും വഴിമാറിയിരിക്കുന്നു. പക്ഷേ, ഓരോ ദിവസവും ചെറിയൊരു ശ്രമം നടത്തിയാൽ ഇതിൽ മാറ്റമുണ്ടാക്കാം. രാത്രി കുട്ടികളുമായി ചേർന്ന് ഉള്ള കഥ പറച്ചിൽ, ആഴ്ചയിൽ ഒരിക്കലെങ്കിലും ഒരുമിച്ച് ചായയ്ക്കായി കുറച്ച് നേരം, ബന്ധു വീട്ടിലെ ചെറിയൊരു സന്ദർശനം... ഇത്തരം ചെറിയ നിമിഷങ്ങൾ ബന്ധങ്ങളെ ഊഷ്മളമാക്കും.

ദമ്പതികൾ തമ്മിലുള്ള ബന്ധം

കുടുംബത്തിന്റെ പുനരുജ്ജീവനത്തിന് വഴിയൊരുക്കുന്ന കണികയാണ് വിശ്വാസം, ബഹുമാനം, തുറന്ന സംഭാഷണം, ചെറിയ ഉപഹാരങ്ങളും വാക്കുകളും നിറഞ്ഞ ആത്മബന്ധം — ഇവയെല്ലാം ചേർന്നാണ് അവരുടെ ബന്ധം മുളച്ചു വലിയ വൃക്ഷങ്ങൾ ആയി മാറുന്നത്. എന്തുകൊണ്ടാണ് ചില കുടുംബങ്ങൾ വലിയ പ്രക്ഷുബ്ധതകൾക്കിടയിലും പൊളിയാതെ നിലനിൽക്കുന്നത്? അതത് സന്ദർഭങ്ങളിൽ അവർ പ്രകടിപ്പിക്കുന്ന സ്നേഹത്തിന്റെ നിറമാർന്ന ഭാവങ്ങളാണ് അതിന്റെ ഉത്തരം.

വീട്ടിലുള്ളവരുടെ വ്യത്യസ്തതകളെ അംഗീകരിക്കണം. ഓരോ വ്യക്തിയുടെയും സ്വത്വത്തെയും ആശയങ്ങളെയും കണക്കിലെടുക്കാതെ ഐക്യം നേടാനാവില്ല. ഒരേ വീട്, ഒരേ തീൻമേശ, പക്ഷേ വ്യത്യസ്ത സ്വപ്നങ്ങൾ, അഭിപ്രായങ്ങൾ, ഭയങ്ങൾ, പ്രായങ്ങൾ — ഇതെല്ലാം ഒരുമിച്ചുവരുന്നയിടമാണ് കുടുംബം. അതിനാൽ, അഭിപ്രായ വ്യത്യാസം ഉണ്ടാകുമ്പോൾ ശാന്തമായി കേൾക്കുക, സംസാരിക്കുക, ഉൾക്കൊള്ളുക എന്ന നിലപാട് അത്യന്താപേക്ഷിതമാണ്.

പുതിയ തലമുറയ്ക്ക് മുന്നിൽ മുതിർന്നവർ കാണിച്ചുകൊടുക്കേണ്ടത് ഇത്തരമൊരു മാതൃകയാണ്. കുടുംബം എന്നത് ഉണ്ടാക്കപ്പെടേണ്ടതും സംരക്ഷിക്കപ്പെടേണ്ടതുമാണ്. അതിന്റെ തുടക്കം നമ്മുടെ ഉള്ളിൽ നിന്ന്, ഒരു ചിരിയിലോ, കൈപിടിപ്പിലോ നിന്ന് തുടങ്ങിയേക്കാം. സന്തോഷമുള്ള ഒരു കുടുംബം പെട്ടെന്ന് ഉണ്ടാകുന്നതല്ല. അതിനുവേണ്ടി നമ്മൾ ശ്രദ്ധയോടെ കാര്യങ്ങൾ ചെയ്യണം, സ്നേഹം കാണിക്കണം, പരസ്പരം ബഹുമാനിക്കണം. ഒരു കുടുംബവും കുറ്റമില്ലാത്തതല്ല, എന്നാൽ ചില കാര്യങ്ങൾ എല്ലാവർക്കും ഒരുപോലെ പ്രധാനമാണ്. നന്നായി സംസാരിക്കുക, നിരുപാധികം സ്നേഹിക്കുക, നല്ല കാര്യങ്ങൾ ഒരുപോലെ വിശ്വസിക്കുക, വിഷമങ്ങളിൽ താങ്ങും തണലുമാകുക - ഇതൊക്കെ ഉണ്ടായാൽ സന്തോഷവും, ഏത് ബുദ്ധിമുട്ടിലും പിടിച്ചുനിൽക്കാനുള്ള കഴിവും, നല്ല ബന്ധവും കുടുംബത്തിൽ തഴച്ചുവളരും.

സന്തുഷ്ട ദാമ്പത്യം കുടുംബത്തിന്റെ ഹൃദയം

കുടുംബത്തിന്റെ തുടിപ്പുകൾ കുട്ടികളാണെങ്കിൽ, അതിന്റെ ഹൃദയസ്പന്ദനം ദമ്പതികളാണ്. ഒരു സന്തോഷകരമായ കുടുംബത്തിൻ്റെ ഏറ്റവും പ്രധാനപ്പെട്ട അടിത്തറയാണ് ദമ്പതികൾ തമ്മിലുള്ള ശക്തമായ ബന്ധം. ഈ ബന്ധമാണ് ആ കുടുംബത്തിന്റെ മുന്നോട്ടുള്ള ഓരോ കാൽവയ്പ്പും നിർണയിക്കുന്നത്. ഓരോ ദിനത്തിലെയും വെല്ലുവിളികളെ നേരിടാൻ നമുക്ക് കരുത്ത് പകരുന്നത്, ദമ്പതികളുടെ ഹൃദയങ്ങളുടെ ഐക്യം, മനസ്സിലെ മധുരസ്മരണകൾ, ശരീരത്തിലെ ഊഷ്മളമായ സ്നേഹം, ആത്മാവിന്റെ ആഴത്തിലുള്ള ഉറപ്പ് എന്നിവയാൽ കെട്ടിപ്പെടുത്ത കുടുംബം ആണ്.

വിവാഹം എന്നത് കേവലം ഒരു ഉത്തരവാദിത്തമല്ല, ഒരു ചേർച്ചയാണ്. എന്നാൽ അത് കാലാകാലങ്ങളായി, അത്യന്തം പ്രാകൃതമായ രീതിയിൽ ഒതുങ്ങി പോയിരിക്കുന്നു. ജീവിതയാത്രയിൽ തങ്ങൾ ഒരുമിച്ച് ഒരേ ദിശയിലേക്കാണോ സഞ്ചരിക്കുന്നത് എന്ന് അവർ സ്വയം ചോദിക്കണം. തങ്ങൾക്കിടയിൽ എത്രത്തോളം തുറന്ന സംഭാഷണങ്ങളുണ്ട് എന്ന് പരിശോധിക്കണം.

വിവാഹം വെറുമൊരു ചടങ്ങോ, ഒരുമിച്ചുള്ള താമസമോ അല്ല; രണ്ട് മനസ്സുകൾ തമ്മിലുള്ള ആഴത്തിലുള്ള ഉടമ്പടിയാണ്. ഇതൊരു തോട്ടം പോലെയാണ് - നനയ്ക്കുകയും വളം നൽകുകയും പരിപാലിക്കുകയും ചെയ്താൽ മനോഹരമായ പുഷ്പങ്ങൾ വിരിയിക്കും. അവഗണിച്ചാൽ വരണ്ടുണങ്ങി നശിച്ചുപോകും. സന്തോഷകരമായ ദാമ്പത്യത്തിന് അടിസ്ഥാനമാകേണ്ട ചില കാര്യങ്ങൾ ഇതാ:

1. വിശ്വാസം:

ഏതൊരു ബന്ധത്തിന്റെയും അടിത്തറയും നെടുംതൂണുമാണ് വിശ്വാസം. പരസ്പരം പൂർണ്ണമായി വിശ്വസിച്ച് ആശ്രയിക്കുമ്പോളാണ് ദാമ്പത്യം ശക്തമാകുന്നത്. ഈ അചഞ്ചലമായ വിശ്വാസം സുരക്ഷിതത്വബോധം വളർത്തുകയും ബന്ധത്തെ കൂടുതൽ ദൃഢമാക്കുകയും ചെയ്യും. സത്യസന്ധതയും വാഗ്ദാനപാലനവുമാണ് വിശ്വാസം വർദ്ധിപ്പിക്കുന്നത്. രഹസ്യങ്ങൾ ഒഴിവാക്കുന്നതും വാക്ക് പാലിക്കുന്നതും ഇതിന് സഹായിക്കും. സംശയങ്ങൾ തുറന്നു സംസാരിക്കുന്നതിലൂടെ ദാമ്പത്യത്തിൽ വിശ്വാസം നിലനിർത്താനാകും.

2. വൈകാരികവും ശാരീരികവുമായ അടുപ്പം:

ദമ്പതികൾക്ക് ശക്തമായ വൈകാരിക അടുപ്പം അനിവാര്യമാണ്. ചിന്തകളും വികാരങ്ങളും സ്വപ്നങ്ങളും ഭയങ്ങളുമെല്ലാം പങ്കുവെക്കാനും മനസ്സിലാക്കാനും കഴിയണം. പരസ്പരം ശ്രദ്ധിക്കുകയും പിന്തുണയ്ക്കുകയും ചെയ്യുന്നത് ഈ അടുപ്പം വർദ്ധിപ്പിക്കും. ഹൃദയം തുറന്ന് സംസാരിക്കുന്നതിലൂടെയും പ്രയാസങ്ങളിൽ താങ്ങും തണലുമാകുന്നതിലൂടെയും ഈ ബന്ധം ശക്തിപ്പെടുത്താം. അതുപോലെ, ശാരീരികമായ അടുപ്പം ദാമ്പത്യത്തിൽ സ്നേഹവും ഊഷ്മളതയും നിലനിർത്താൻ സഹായിക്കുന്നു. സ്നേഹത്തോടെയുള്ള സ്പർശനവും ലൈംഗിക ബന്ധവും ഈ അടുപ്പം വർദ്ധിപ്പിക്കുകയും ബന്ധത്തെ കൂടുതൽ ദൃഢമാക്കുകയും ചെയ്യും.

3. പൊതുവായ ലക്ഷ്യങ്ങൾ:

ജീവിതത്തെയും ഭാവിയെയും കുറിച്ചുള്ള പൊതുവായ ലക്ഷ്യങ്ങൾ ദമ്പതികൾക്ക് ഉണ്ടാകേണ്ടത് പ്രധാനമാണ്. സാമ്പത്തിക കാര്യങ്ങൾ, കുടുംബത്തിൻ്റെ വളർച്ച, കുട്ടികളുടെ വിദ്യാഭ്യാസം തുടങ്ങിയ കാര്യങ്ങളിൽ ഒരുമിച്ചുള്ള കാഴ്ചപ്പാടുകൾ ഐക്യം വളർത്തും. ലക്ഷ്യങ്ങൾ ഒരുമിച്ച് ചർച്ച ചെയ്യുകയും അതിനായുള്ള ശ്രമങ്ങളിൽ പരസ്പരം പിന്തുണയ്ക്കുകയും ചെയ്യുന്നത് ദാമ്പത്യത്തിന് ദിശാബോധം നൽകും. ഭാവിയെക്കുറിച്ചുള്ള സ്വപ്നങ്ങൾ പങ്കുവെക്കുന്നതും സാമ്പത്തിക കാര്യങ്ങളിൽ ഒരുമിച്ച് തീരുമാനമെടുക്കുന്നതും ഇതിന് സഹായിക്കും.

4. പരസ്പര ബഹുമാനം:

ഓരോ വ്യക്തിയുടെയും സ്വത്വത്തെയും അഭിപ്രായങ്ങളെയും ബഹുമാനിക്കുക എന്നത് ആരോഗ്യകരമായ ദാമ്പത്യത്തിന്റെ അടിത്തറയാണ്. പരസ്പരം താഴ്ത്തിക്കെട്ടുന്നതും കുറ്റപ്പെടുത്തുന്നതും ഒഴിവാക്കണം. ഓരോരുത്തരുടെയും ഇഷ്ടങ്ങൾക്കും താൽപ്പര്യങ്ങൾക്കും പ്രാധാന്യം നൽകുകയും അംഗീകരിക്കുകയും വേണം. അഭിപ്രായ വ്യത്യാസങ്ങൾ ഉണ്ടാകുമ്പോൾ പോലും ബഹുമാനത്തോടെ സംസാരിക്കുകയും മറ്റൊരാളുടെ കാഴ്ചപ്പാടുകളെ വിലമതിക്കുകയും ചെയ്യുന്നത് ബന്ധത്തിൽ സൗഹൃദം നിലനിർത്താൻ സഹായിക്കും. പങ്കാളിയുടെ കാഴ്ചപ്പാടുകളെ മാനിക്കുന്നതും തെറ്റുകൾ സംഭവിക്കുമ്പോൾ കുറ്റപ്പെടുത്താതിരിക്കുന്നതും പ്രധാനമാണ്.

5. സമയം കണ്ടെത്താം, സ്നേഹം പങ്കിടാം :

ജോലിയുടെയും മറ്റ് ഉത്തരവാദിത്തങ്ങളുടെയും തിരക്കിനിടയിൽ ദമ്പതികൾ തങ്ങളുടെ ബന്ധത്തിന് സമയം കണ്ടെത്തേണ്ടത് അത്യാവശ്യമാണ്. അതിനായി ചില ലളിതമായ വഴികൾ:

•  പ്രത്യേക സമയം: ഒരുമിച്ചിരിക്കാനും സംസാരിക്കാനും സ്നേഹം പങ്കുവെക്കാനും ദമ്പതികൾക്ക് മാത്രമായുള്ള സമയം കണ്ടെത്തുക. ദിവസവും അൽപനേരം ഒരുമിച്ചിരുന്ന് സംസാരിക്കുന്നതും, ഒരുമിച്ച് ഭക്ഷണം കഴിക്കുന്നതും, ആഴ്ചയിൽ ഒരിക്കൽ ഒരുമിച്ചിരിക്കാൻ സമയം കണ്ടെത്തുന്നതും ചെറിയ യാത്രകൾ പ്ലാൻ ചെയ്യുന്നതും ബന്ധത്തിന് ഊർജ്ജം നൽകും. ചെറിയ കാര്യങ്ങളിൽ പോലും പരസ്പരം അഭിനന്ദിക്കാൻ മറക്കരുത്.
•  തുറന്ന ആശയവിനിമയം: ആരോഗ്യകരമായ ബന്ധത്തിന് സത്യസന്ധമായ ആശയവിനിമയം അനിവാര്യമാണ്. നിങ്ങളുടെ ആവശ്യങ്ങളും ആഗ്രഹങ്ങളും ഭയങ്ങളും പങ്കാളിയുമായി തുറന്നു സംസാരിക്കുക. അവരുടെ വാക്കുകൾ ശ്രദ്ധയോടെ കേൾക്കുകയും മനസ്സിലാക്കുകയും ചെയ്യുക. എന്തും തുറന്നു പറയാനുള്ള അവസരമുണ്ടാക്കുകയും അവരുടെ കാഴ്ചപ്പാടുകളെ ബഹുമാനിക്കുകയും ചെയ്യുക.
•  ഭിന്നതകളെ മനോഹരമായി കൈകാര്യം ചെയ്യാം: അഭിപ്രായ വ്യത്യാസങ്ങളും വഴക്കുകളും ഉണ്ടാകുന്നത് സ്വാഭാവികമാണ്. എന്നാൽ അവ ശാന്തമായി ഇരുന്ന് സംസാരിച്ച് പരിഹരിക്കാൻ ശ്രമിക്കുക. കുറ്റപ്പെടുത്തുന്നതും പഴിക്കുന്നതും ഒഴിവാക്കി, പ്രശ്നത്തിൽ ശ്രദ്ധ കേന്ദ്രീകരിച്ച് ഇരുവർക്കും തൃപ്തികരമായ ഒരു പരിഹാരം കണ്ടെത്താൻ ശ്രമിക്കുക.
•  ഭാവിയെക്കുറിച്ചുള്ള ഒരുമിച്ചുള്ള കാഴ്ചപ്പാട്: സന്തോഷകരമായ കുടുംബത്തിന് ഭാവിയെക്കുറിച്ച് ഒരു പൊതുവായ കാഴ്ചപ്പാട് ഉണ്ടാകേണ്ടത് പ്രധാനമാണ്. ഒരുമിച്ചുള്ള സ്വപ്നങ്ങൾ കാണുന്നത് ബന്ധത്തിന് ഒരു ദിശാബോധം നൽകും.
•  പ്രണയവും സൗഹൃദവും നിലനിർത്തുക: കാലക്രമേണ പ്രണയവും ആകർഷണവും കുറഞ്ഞുപോകാതെ ശ്രദ്ധിക്കുക. പ്രണയാതുരമായ നിമിഷങ്ങൾ സൃഷ്ടിക്കുന്നതും നല്ല സുഹൃത്തുക്കളായിരിക്കുന്നതും ഇതിന് സഹായിക്കും. ചെറിയ സമ്മാനങ്ങൾ നൽകുക, മനോഹരമായ വാക്കുകൾ പറയുക, ഒരുമിച്ച് യാത്രകൾ പോകുക, തമാശകൾ പറയുക, ഇഷ്ടമുള്ള കാര്യങ്ങൾ പങ്കുവെക്കുക എന്നിവ ബന്ധം പുതുക്കാൻ സഹായിക്കും.

തിരക്കിട്ട ജീവിതത്തിൽ ദാമ്പത്യത്തിന് സമയം കണ്ടെത്തുന്നത് ബുദ്ധിമുട്ടാണെന്ന് തോന്നിയേക്കാം. എന്നാൽ, ചെറിയ കാര്യങ്ങളിലൂടെ പോലും നിങ്ങളുടെ ബന്ധം ശക്തിപ്പെടുത്താൻ സാധിക്കും. പരസ്പരം മനസ്സിലാക്കുകയും സ്നേഹിക്കുകയും പിന്തുണയ്ക്കുകയും ചെയ്യുമ്പോൾ, ഏത് തിരക്കിനിടയിലും നിങ്ങളുടെ ദാമ്പത്യം സന്തോഷത്തോടെ നിലനിൽക്കും, അത് നിങ്ങളുടെ കുടുംബത്തിനും സന്തോഷം നൽകും. ദാമ്പത്യം ഒരു യാത്രയാണ്, അതിലെ സന്തോഷങ്ങളും ദുഃഖങ്ങളും ഒരുമിച്ച് പങ്കിടുമ്പോളാണ് അത് മനോഹരമാകുന്നത്.

Reena VR

Sr. Psychologist

THE INSIGHT CENTRE

Trivandrum

8590043039