മ്യാൻമര്‍ ഭൂകമ്പം; മരണം 3000 കടന്നു, താല്‍ക്കാലിക വെടിനിര്‍ത്തൽ പ്രഖ്യാപിച്ച് സൈനിക ഭരണകൂടം

നായ്പിഡാവ്: മ്യാൻമറിനെ തകര്‍ത്തെറിഞ്ഞ സംഭവത്തിൽ മരണം 3000 കടന്നു. രക്ഷാപ്രവര്‍ത്തനം പുരോഗമിച്ചുകൊണ്ടിരിക്കുകയാണ്. പുനരധിവാസ പ്രവർത്തനങ്ങൾക്കിടയിൽ, മ്യാൻമറിലെ സൈനിക ഭരണകൂടം ബുധനാഴ്ച താല്‍ക്കാലിക വെടിനിര്‍ത്തൽ പ്രഖ്യാപിച്ചു. ദുരിതാശ്വാസ, പുനരധിവാസ പ്രവർത്തനങ്ങൾക്കായിട്ടാണ് തീരുമാനം എടുത്തതെന്ന് റിപ്പോർട്ടുകൾ പറയുന്നു. താല്‍ക്കാലിക വെടിനിര്‍ത്തൽ രക്ഷാപ്രവര്‍ത്തനം എളുപ്പാക്കിയേക്കുമെന്നാണ് പ്രതീക്ഷ. ഏപ്രിൽ 22 വരെയാണ് വെടിനിര്‍ത്തൽ.

2021 ൽ നൊബേൽ ജേതാവ് ഓങ് സാൻ സൂ ചിയുടെ സർക്കാരിനെ അട്ടിമറിച്ച സൈനികഭരണകൂടത്തിനെതിരെ ആഭ്യന്തര കലാപം രൂക്ഷമാണ്. വെള്ളിയാഴ്ചയുണ്ടായ വിനാശകരമായ ഭൂകമ്പത്തിന് തൊട്ടുപിന്നാലെ, കെഎൻയു ആസ്ഥാനത്തിന് സമീപമുള്ള കാരെൻ സംസ്ഥാനത്ത് സൈനിക ജെറ്റുകൾ വ്യോമാക്രമണങ്ങളും ഡ്രോൺ ആക്രമണങ്ങളും നടത്തിയതായി ദുരിതാശ്വാസ സംഘടനയായ ഫ്രീ ബർമ്മ റേഞ്ചേഴ്‌സ് അറിയിച്ചു. എംആർടിവിയുടെ റിപ്പോർട്ട് അനുസരിച്ച്, സ്ഥിതിഗതികൾ വഷളാക്കാൻ വംശീയ സായുധ ഗ്രൂപ്പുകളും പ്രാദേശിക സായുധ സംഘങ്ങളും സംസ്ഥാന സുരക്ഷാ സേനയെയും സൈനിക താവളങ്ങളെയും ആക്രമിക്കുന്നതിൽ നിന്ന് വിട്ടുനിൽക്കും. ആ ഗ്രൂപ്പുകൾ ആ നിബന്ധനകൾ പാലിക്കുന്നില്ലെങ്കിൽ, സൈന്യം ആവശ്യമായ നടപടികൾ സ്വീകരിക്കുമെന്ന് പ്രസ്താവനയിൽ പറയുന്നു.

2,700-ലധികം ആളുകളുടെ മരണത്തിനും മാനുഷിക പ്രതിസന്ധിക്കും കാരണമായ ദുരന്തത്തിന് ശേഷം രാജ്യത്തിന്‍റെ പുനരധിവാസം സുഗമമാക്കുന്നതിനാണ് വെടിനിർത്തൽ എന്ന് എംആർടിവി റിപ്പോര്‍ട്ടിൽ വ്യക്തമാക്കുന്നു. സൈന്യം ആക്രമണങ്ങൾ നിർത്തിവച്ചതായി മിൻ ഓങ് ഹ്ലയിംഗ് പറഞ്ഞു, എന്നാൽ അജ്ഞാത വിമതർ ദുരന്തം മുതലെടുത്ത് ആക്രമിക്കാൻ തയ്യാറെടുക്കുകയായിരുന്നു. സായുധ സേന അതനുസരിച്ച് പ്രതികരിക്കുമെന്ന് അദ്ദേഹം മുന്നറിയിപ്പ് നൽകി.ഭൂചലനമുണ്ടായതിന് പിന്നാലെ തദ്ദേശീയ സേനകളും വെടിനിര്‍ത്തൽ പ്രഖ്യാപിച്ചിരുന്നു. ഇതിനിടെ പട്ടാള ഭരണകൂടം സഹായവിതരണം തടസപ്പെടുത്തുന്നതായി ആരോപണമുയര്‍ന്നിരുന്നു. "ഭൂകമ്പത്തിൽ ജനങ്ങൾ വലിയ ദുരിതം അനുഭവിക്കുമ്പോഴും, സൈനിക ഭരണകൂടം സിവിലിയൻ പ്രദേശങ്ങളിൽ വ്യോമാക്രമണം നടത്തുന്നത് തുടരുകയാണ്" കരൺ നാഷണൽ യൂണിയൻ പ്രസ്താവനയിറക്കി.

വെള്ളിയാഴ്ച മ്യാൻമറിലെ രണ്ടാമത്തെ വലിയ നഗരമായ മണ്ടാലെയ്ക്ക് സമീപമാണ് റിക്ടർ സ്കെയിലിൽ 7.7 തീവ്രത രേഖപ്പെടുത്തിയ ഭൂകമ്പം ഉണ്ടായത്. നഗരത്തിലെ വിമാനത്താവളങ്ങളും റോഡുകളും നൂറുകണക്കിന് കെട്ടിടങ്ങളും തകരുകയും ചെയ്തു. ഭൂചലനത്തിൽ വലിയ നാശനഷ്ടമാണുണ്ടായത്. ഭൂകമ്പം ജീവൻ അപഹരിക്കുക മാത്രമല്ല, ആഭ്യന്തരയുദ്ധം തുടരുന്നതിനിടയിൽ രാജ്യത്ത് പട്ടിണിയും രോഗങ്ങളും പൊട്ടിപ്പുറപ്പെടാനുള്ള സാധ്യതയും വർധിപ്പിച്ചിട്ടുണ്ടെന്ന് സന്നദ്ധ സംഘടനകളും ഐക്യരാഷ്ട്രസഭയും മുന്നറിയിപ്പ് നൽകി.