ഗസ്സ വെടിനിര്‍ത്തൽ; ദോഹ ചർച്ച പ്രതിസന്ധിയിൽ, കൂട്ടക്കൊല തുടര്‍ന്ന് ഇസ്രായേൽ

തെൽ അവിവ്: ഗസ്സയിൽ പട്ടിണിമരണവും കൂട്ടക്കുരുതിയും തുടരുന്നതിനിടെ ദോഹ ചർച്ചയിൽ നിന്ന്​ സംഘത്തെ തിരികെ വിളിച്ച്​ ഇസ്രായേലും അമേരിക്കയും. ബന്ദികളുടെ മോചനത്തിനും മറ്റുമായി വേറെ വഴി തേടുമെന്ന്​ അമേരിക്ക മുന്നറിയിപ്പ്​ നൽകി. അതിനിടെ ഗസ്സയിൽ ഭക്ഷണത്തിന്​ വരിനിന്ന 19 പേരുൾപ്പെടെ 62 പേർ കൂടി കൊല്ലപ്പെട്ടു.

ഗസ്സയിൽ മാനുഷിക സംവിധാനങ്ങൾ പൂർണമായും തകർന്നിരിക്കെ, കൂട്ടമരണം ഒഴിവാക്കാൻ അടിയന്തര നടപടി വേണമെന്ന്​ യുഎൻ ഏജൻസികൾ. ​പട്ടിണിയും പോഷകാഹാരകുറവും മൂലം നൂറിലേറെ പേർ മരണത്തിന്​ കീഴടങ്ങിയ ഗസ്സയിലേക്ക്​ കൂടുതൽ സഹായം കൈമാറണമെന്ന യൂറോപ്യൻ യൂണിയൻ അഭ്യർഥന ഇസ്രായേൽ തള്ളി. അമേരിക്കയും ഇസ്രായേലും ഏർപ്പെടുത്തിയ ഗസ്സ ഹ്യുമാനിറ്റേറിയൻ ഫൗണ്ടേഷൻ കേന്ദ്രത്തിനു മുമ്പാകെ ഭക്ഷണത്തിനു കാത്തുനിന്ന പട്ടിണിപ്പാവങ്ങൾക്ക്​ നേരെ ഇന്നലെയും വെടിവെപ്പുണ്ടായി. 19 പേരാണ്​ ഇതിൽ കൊല്ലപ്പെട്ടത്​. ഇതോടെ ഈ നിലക്കുള്ള മരണസംഖ്യ മാത്രം 1200 കവിഞ്ഞു.

ഗസ്സയിൽ ഇതിനകം കൊല്ലപ്പെട്ട 59,000 പേരിൽ 19,000 കുഞുങ്ങൾ ഉൾപ്പെടുന്നതായി ഗസ്സ ആരോഗ്യ മന്ത്രാലയം വെളിപ്പെടുത്തി. ഇന്​ധനക്ഷാമം മൂലം ആശുപത്രികളിൽ പലതിന്‍റെയും പ്രവർത്തനം നിലച്ചിരിക്കുകയാണ്​. അതിനിടെ, ദോഹ കേന്ദ്രീകരിച്ചു നടന്ന വെടിനിർത്തൽ ചർച്ച പരാജയപ്പെട്ടു. ഇസ്രായേലും അമേരിക്കയും തങ്ങളുടെ സംഘത്തെ ദോഹയിൽ നിന്ന്​ തിരികെ വിളിച്ചു.

ഹമാസിന്‍റെ നിലപാടാണ്​ വെടിനിർത്തൽ ചർച്ചക്ക്​ തിരിച്ചടിയായതെന്ന്​ യുഎസ്​ പശ്​ചിമേഷ്യൻ ദൂതൻ സ്റ്റിവ്​ വിറ്റ്​കോഫ്​ ആരോപിച്ചു. ബന്ദികളുടെ മോചനത്തിനും മറ്റുമായി ബദൽ മാർഗങ്ങൾ തേടുമെന്നും അദ്ദേഹം പറഞ്ഞു. വെടിനിർത്തലുമായി ബന്​ധപ്പെട്ട പുതിയ നിർദേശം ഹമാസ്​ കൈമാറിയെങ്കിലും ഇസ്രായേലും അമേരിക്കയും ​അതിനോട്​ പ്രതികരിച്ചിട്ടില്ല. ഗസ്സയിൽ ലക്ഷ്യം നേടും വരെ സൈനിക നടപടി തുടരുമെന്ന്​ ഇസ്രായേൽ പ്രധാനമന്ത്രി ബിന്യമിൻ നെതന്യാഹു പറഞ്ഞു.വടക്കൻ ഗസ്സയിൽ സ്​ഫോടകവസ്തു ശേഖരം പൊട്ടിത്തെറിച്ച്​ 8 സൈനികർക്ക്​ പരിക്കേറ്റു. യൂറോപ്യൻ നഗരങ്ങളിലും ഇസ്രായേൽ തലസ്ഥാന നഗരിയായ തെൽ അവീവിലും ഗസ്സ യുദ്ധം അവസാനിപ്പിക്കണം എന്നാവശ്യപ്പെട്ട്​ റാലികൾ നടന്നു.