എന്നെ ചീത്തവിളിക്കരുത്, ഇപ്പോൾ ബാറ്റിങ് എളുപ്പം. മഗ്രാത്ത്, അക്രം, പൊള്ളോക്ക്, ഡൊണാൾഡ് എന്നിവരോടൊപ്പം പറയാൻ പറ്റിയ എത്ര പേരുകൾ ഇന്നുണ്ട് -കെവിൻ പീറ്റേഴ്സൺ

ലണ്ടൻ: ഇംഗ്ലീഷ് താരം ജോ റൂട്ട് ടെസ്റ്റ് ക്രിക്കറ്റിലെ റൺവേട്ടക്കാരിൽ രണ്ടാമ​തെത്തിയതിന് പിന്നാലെ പ്രതികരണവുമായി മുൻ താരം കെവിൻ പീറ്റേഴ്സൺ. വർത്തമാന കാലത്തെ ബാറ്റിങ് എളുപ്പമാണെന്ന് അഭിപ്രായപ്പെട്ട പീറ്റേഴ്സൺ മുൻകാല ബൗളർമാർക്കൊത്തവർ ഇന്നില്ലെന്നും അഭിപ്രായപ്പെട്ടു.

‘‘എന്നെ ചീത്ത വിളിക്കരുത്. 20-25 വർഷം മു​മ്പുള്ളതിനേക്കാൾ  എളുപ്പമാണ് ഇപ്പോഴത്തെ ബാറ്റിങ്. നിലവിലുള്ളതിനേക്കാൾ ഇരട്ടി കഠിനമായിരുന്നു അന്നത്തെ ബാറ്റിങ്.

‘‘ വഖാർ, അക്തർ, മുഷ്താഖ്, കും​െബ്ല, ശ്രീനാഥ്, ഹർഭജൻ, ഡൊണാൾഡ്, പൊള്ളോക്ക്, ക്ലൂസ്നർ, ഗഫ്, മഗ്രാത്ത്, ലീ, വോൺ, ഗില്ലസ്പി, ബോണ്ട്, വെറ്റോറി, കെയിൻസ്, ചമിന്ദ വാസ്, മുരളി, ആംബ്രോസ്, വാൽഷ് എന്നിങ്ങനെ നീളുന്ന ഒരുപാട് പേർ അന്നുണ്ടായിരുന്നു’’

‘‘ഞാൻ പറഞ്ഞ ഈ 22 പേരുകൾക്കൊപ്പം വെക്കാൻ പോന്ന വർത്തമാനകാലത്തെ പത്ത് ബൗളർമാരുടെയെങ്കിലും പേര് പറയാമോ?’’ -പീറ്റേഴ്സൺ സമൂഹമാധ്യമമായ ‘എക്സിൽ’ പ്രതികരിച്ചു.

എന്നാൽ പീറ്റേഴ്സന്റെ അഭിപ്രായത്തിനെതിരെ നിരവധി പേർ രംഗത്തെത്തിയിട്ടുണ്ട്. സ്റ്റാർക്ക്, കമ്മിൻസ്, മോർക്കൽ ലിയോൺ, അശ്വിൻ, റബാദ, ആൻഡേഴ്സൺ അടക്കമുള്ള നിരവധി ബൗളർമാർ അവർക്ക് ശേഷവും ഉണ്ടായിട്ടുണ്ട് എന്നാണ് അവരുടെ ഓർമപ്പെടുത്തൽ.