വിസ അപേക്ഷകളിൽ കൃത്യത ഉറപ്പാക്കണം: ജിഡിആർഎഫ്എ-ദുബൈ

ദുബൈ: ദുബൈയിൽ വിസയ്ക്ക് അപേക്ഷിക്കുന്നവർ തങ്ങളുടെ അപേക്ഷകളിൽ നൽകുന്ന വിവരങ്ങളുടെ കൃത്യത ഉറപ്പാക്കണമെന്ന് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (GDRFA- Dubai) അറിയിച്ചു. അപേക്ഷകരിൽ ചിലർ പലപ്പോഴും ഈ കാര്യത്തിൽ അശ്രദ്ധ വരുത്തുന്ന സാഹചര്യത്തിലാണ് ജിഡിആർഎഫ്എയുടെ ഈ നിർദേശം. വിസ സേവനങ്ങൾ തേടുന്ന ആളുകൾ അവ്യക്തമായ വിവരങ്ങൾ നൽകുന്നത് നടപടിക്രമങ്ങൾക്ക് സ്വാഭാവികമായും കാലതാമസം വരുത്തുമെന്ന് അധികൃതർ ചൂണ്ടിക്കാട്ടി. ശരിയായതും കൃത്യമായതുമായ വിവരങ്ങൾ വിസ നടപടികൾ കൂടുതൽ വേഗത്തിലാക്കാൻ സഹായിക്കുമെന്നും ജനറൽ ഡയറക്ടറേറ്റ് കൂട്ടിച്ചേർത്തു.

ദുബൈയിൽ ആളുകൾ ആമർ സെന്ററുകൾ വഴിയോ വകുപ്പിന്റെ സ്മാർട്ട് ചാനലുകൾ വഴിയോ എമിഗ്രേഷൻ ഡിപ്പാർട്ട്മെന്റിലേക്ക് സമർപ്പിക്കുന്ന സേവന അപേക്ഷകളിൽ വ്യക്തി വിവരങ്ങൾ, ഇമെയിൽ ഐഡി, മൊബൈൽ നമ്പർ, പേരുകളിലെ സ്‌പെല്ലിംഗ് എന്നിവയെല്ലാം കൃത്യമാണെന്ന് പരിശോധിച്ച് ഉറപ്പുവരുത്തണം. അപേക്ഷ-നടപടിയുടെ ഓരോ ഘട്ടവും വകുപ്പ് ഉപയോക്താക്കളെ അറിയിക്കുന്നത് ഈ വിവരങ്ങളുടെ അടിസ്ഥാനത്തിലാണ്. അതിനാൽ, അപേക്ഷിച്ച വിവരങ്ങൾ ശരിയാണെന്ന് സേവനം തേടുന്നവർ എപ്പോഴും ശ്രദ്ധിക്കണമെന്ന് ജിഡിആർഎഫ്എ പൊതുജങ്ങളെ ഓർമിപ്പിച്ചു.

'ഏറ്റവും വേഗത്തിലാണ് ദുബൈയിൽ വിസ നടപടികൾ പൂർത്തിയാക്കി നൽകുന്നത്. ഉപയോക്താക്കൾക്ക് എല്ലായ്‌പ്പോഴും സന്തോഷകരമായ സേവനങ്ങൾ നൽകാനാണ് ജനറൽ ഡയറക്ടറേറ്റ് ശ്രദ്ധിക്കുന്നത്' ജിഡിആർഎഫ്എ മേധാവി ലഫ്റ്റനന്റ് ജനറൽ മുഹമ്മദ് അഹ്‌മദ് അൽ മർറി പറഞ്ഞു. എന്നാൽ, ഉപയോക്താക്കൾ നൽകുന്ന തെറ്റായ വിവരങ്ങൾ കാരണം ചില സമയങ്ങളിൽ അപേക്ഷകൾക്ക് മേൽ നടപടികൾക്ക് കാലതാമസം വരുന്നുണ്ട്. അതിനാൽ, അപേക്ഷകർ വ്യക്തമായ വിവരങ്ങൾ നൽകാനും, അപേക്ഷിച്ചത് ശരിയായാണെന്ന് വീണ്ടും ഉറപ്പുവരുത്തുകയും ചെയ്യണമെന്ന് അദ്ദേഹം നിർദേശിച്ചു.

നിങ്ങളുടെ അപേക്ഷയിലെ വിവരങ്ങൾ ശരിയാണെന്ന് ഉറപ്പുവരുത്തേണ്ടത് അപേക്ഷകന്റെ ഉത്തരവാദിത്തമാണെന്ന് ജിഡിആർഎഫ്എ-ദുബൈ പറയുന്നു. അപേക്ഷകൾ ടൈപ്പ് ചെയ്ത ശേഷം, എമിഗ്രേഷനിലേക്ക് സമർപ്പിക്കുന്നതിന് മുൻപ് വിവരങ്ങൾ ശരിയാണെന്ന് ശ്രദ്ധിക്കുന്നത് ഏറ്റവും വേഗത്തിൽ സന്തോഷകരമായ സേവനങ്ങൾ ഉറപ്പുവരുത്തുമെന്ന് അധികൃതർ വ്യക്തമാക്കി.