സിദ്ധിഖ്-ലാലുമായി കടുത്ത പിണക്കം, എന്നിട്ടും മുകേഷ് ആ ഒരൊറ്റ വാക്ക് പറഞ്ഞില്ലായിരുന്നുവെങ്കിൽ ഹരിഹർ നഗർ 2 ഉണ്ടാകില്ലായിരുന്നു; വെളിപ്പെടുത്തൽ

കൊച്ചി: മലയാള സിനിമയിലെ എക്കാലത്തെയും വലിയ കോമഡി ക്ലാസിക്കുകളിലൊന്നായ 'ഇൻ ഹരിഹർ നഗറി'ന്റെ രണ്ടാം ഭാഗമായ 'ടു ഹരിഹർ നഗർ' യാഥാർത്ഥ്യമായതിന് പിന്നിലെ നാടകീയ സംഭവങ്ങൾ വെളിപ്പെടുത്തി സംവിധായകനും നടനുമായ ആലപ്പി അഷ്റഫ്. സംവിധായകരായ സിദ്ധിഖ്-ലാലുമായി വ്യക്തിപരമായ വലിയ അകൽച്ച നിലനിൽക്കെയാണ് നടൻ മുകേഷ് ആ പ്രോജക്റ്റുമായി സഹകരിച്ചതെന്നും, മുകേഷ് അന്ന് വിസമ്മതിച്ചിരുന്നെങ്കിൽ ചിത്രം ഉപേക്ഷിക്കാനായിരുന്നു ലാലിന്റെ തീരുമാനമെന്നും ആലപ്പി അഷ്റഫ് തന്റെ യുട്യൂബ് ചാനലിലൂടെ ഓർത്തെടുത്തു.

'ഇൻ ഹരിഹർ നഗർ' വൻ വിജയമായി വർഷങ്ങൾ പിന്നിട്ട ശേഷമാണ് സംവിധായകൻ ലാൽ ചിത്രത്തിന്റെ രണ്ടാം ഭാഗം ആലോചിക്കുന്നത്. എന്നാൽ ആ സമയത്ത് മുകേഷും സംവിധായകരായ സിദ്ധിഖ്-ലാലും തമ്മിൽ ചില അസ്വാരസ്യങ്ങൾ ഉടലെടുത്തിരുന്നു. ഇവർ തമ്മിൽ മാനസികമായ വലിയ അകൽച്ചയുണ്ടായിരുന്നതിനാൽ രണ്ടാം ഭാഗത്തിൽ മുകേഷ് അഭിനയിക്കാൻ തയ്യാറാകുമോ എന്ന കാര്യത്തിൽ ലാലിന് വലിയ ആശങ്കയുണ്ടായിരുന്നു.

മുകേഷിനോട് നേരിട്ട് സംസാരിക്കാനും, അദ്ദേഹം തയ്യാറല്ലെങ്കിൽ 'ഇൻ ഹരിഹർ നഗറി'ന്റെ രണ്ടാം ഭാഗം എന്ന ആശയം എന്നെന്നേക്കുമായി ഉപേക്ഷിക്കാനുമായിരുന്നു ലാലിന്റെ തീരുമാനം. അങ്ങനെ വലിയ പ്രതീക്ഷകളൊന്നുമില്ലാതെ ലാൽ മുകേഷിനെ വിളിച്ച് കാര്യം അവതരിപ്പിച്ചു. എന്നാൽ, വ്യക്തിപരമായ എല്ലാ പിണക്കങ്ങളും വൈരാഗ്യങ്ങളും മാറ്റിവെച്ച്, സിനിമയോടുള്ള ആത്മാർത്ഥത മുൻനിർത്തി താൻ ആ ചിത്രത്തിൽ അഭിനയിക്കാമെന്ന് മുകേഷ് സമ്മതിക്കുകയായിരുന്നു.

മുകേഷ് അഭിനയിക്കാൻ സമ്മതിച്ചപ്പോൾ ലാൽ അദ്ദേഹത്തോട് പറഞ്ഞത്, "താൻ സഹകരിക്കില്ലെന്നാണ് പറഞ്ഞിരുന്നതെങ്കിൽ ഈ പ്രോജക്റ്റ് തന്നെ എന്നെന്നേക്കുമായി ഉപേക്ഷിക്കാനായിരുന്നു എന്റെ പ്ലാൻ" എന്നായിരുന്നു. മുകേഷ് അന്ന് ആ സിനിമ വേണ്ടെന്ന് വെച്ചിരുന്നെങ്കിൽ 'ടു ഹരിഹർ നഗറും' തുടർന്നു വന്ന മൂന്നാം ഭാഗമായ 'ഇൻ ഗോസ്റ്റ് ഹൗസ് ഇന്നും' പ്രേക്ഷകർക്ക് കാണാൻ സാധിക്കുമായിരുന്നില്ലെന്ന് ആലപ്പി അഷ്റഫ് ചൂണ്ടിക്കാട്ടുന്നു. താനും മുകേഷും തമ്മിൽ ഇക്കാര്യം മുൻപ് സംസാരിച്ചിട്ടുണ്ടെന്നും, ഒരു യഥാർത്ഥ കലാകാരന് കലയോടും സിനിമയോടും ഉള്ള ഉത്തരവാദിത്തവും പ്രതിബദ്ധതയുമാണ് മുകേഷ് അന്ന് കാട്ടിയതെന്നും ആലപ്പി അഷ്റഫ് വ്യക്തമാക്കി.