വെടിനിര്‍ത്തലിന് പുല്ല് വില;42 ദിവസത്തിനിടെ ഇസ്രായേല്‍ കൊന്നുതള്ളിയത് 318 ഫലസ്തീനികളെ

ഗസ്സ സിറ്റി: വെടിനിർത്തലിന്‍റെ 42-ാം നാളിൽ ഗസ്സയിൽ ആക്രമണം കടുപ്പിച്ച്​ ഇസ്രായേൽ സേന. വിവിധ ആക്രമണ സംഭവങ്ങളിലായി 22 പേരാണ്​ ഇന്നലെ കൊല്ലപ്പെട്ടത്​. അമ്പതിലേറെ പേർക്ക്​ പരിക്കേറ്റു. തിരക്കേറിയ ഗസ്സ സിറ്റിയിൽ ഒരു വാഹനത്തിനു നേരെ നടത്തിയ ഡ്രോൺ ആക്രമണത്തിൽ അഞ്ചു പേർ കൊല്ലപ്പെട്ടു. ​വെടിനിർത്തൽ ഒന്നര മാസത്തിലേക്ക്​ കടക്കാനിരിക്കെ, നാനൂറി​ലേ​റെ ലംഘനങ്ങൾ വഴി ഇ​സ്രായേൽ 318 ഫലസ്തീനിക​ളെ ​കൊ​ന്നൊടുക്കിയതായി ഗസ്സ ആരോഗ്യ മന്ത്രാലയംഅറിയിച്ചു.788 പേർക്ക്​ പരിക്കേൽക്കുകയും ​ചെയ്തു.

റഫയിൽ യെല്ലോ ലൈൻ മറികടന്ന്​ ഇസ്രായേൽ സേന വീണ്ടും ഉള്ളിലേക്ക്​ കയറിയത്​ ആശങ്ക വർധിപ്പിച്ചു. എന്നാൽ യെല്ലോ ലൈൻ ലംഘിച്ച്​ ഹമാസ്​ പോരാളി രംഗത്തു വന്നതായും ഇതിനെ പ്രതിരോധിക്കാൻ സേന നടത്തിയ പ്രത്യാക്രമണത്തിൽ അഞ്ചു പേരെ വധിച്ചതായും ഇസ്രായേൽ പ്രധാനന്ത്രി ബിന്യമിൻ നെതന്യാഹു പറഞു. യെല്ലോ ലൈൻ ലംഘിച്ചെന്ന ആരോപണം ഹമാസ്​ തള്ളി. നിലവിലെ സാഹചര്യത്തിൽ ഗസ്സ വെടിനിർത്തൽ കരാറിന്‍റെ ഭാവി അപകടത്തിലാണെന്നും അടിയന്തര ഇടപെടൽ ​വേണ​മെന്നും മധ്യസ്ഥ രാജ്യങ്ങൾക്ക്​ ഹമാസ്​ മുന്നറിയിപ്പ്​ നൽകിയതായി 'അൽജസീറ' റിപ്പോർട്ട്​ ​ചെയ്തു. അധിനിവിഷ്​ട വെസ്റ്റ് ബാങ്ക്​ പ്രദേശങ്ങളിൽ ഇസ്രായേൽ സുരക്ഷാ ​സേനയും ജൂത കുടി​യേറ്റക്കാരും നടത്തുന്ന ഫലസ്തീൻ വിരുദ്ധ നടപടികളിൽ യു.എന്നും യൂറോപ്യൻ യൂനിയനും ആശങ്ക ​പ്രകടിപ്പിച്ചു. ​പ്രതികൂല കാലാവസ്ഥയും കുടി​വെള്ള ലഭ്യതക്കുറവും മൂലം ഗസ്സയിൽ പതിനായിരങ്ങളു​ടെ ജീവിതം ദുരിതപൂർണമായതായി യു.എൻ ഏജൻസികൾ അറിയിച്ചു.