പാലക്കാട്: പാറമേക്കാവിന്റെ പടക്കനിർമാണശാല ഉടമയ്ക്കതിരെ കേസെടുത്ത് പൊലീസ്. ലൈസൻസിൽ അനുവദിച്ചതിനേക്കാൾ കൂടുതൽ വെടിമരുന്ന് സൂക്ഷിച്ചതായി കണ്ടെത്തിയതിനെ തുടർന്നാണ് കേസെടുത്തത്. മുതലമട വെള്ളാരംകടവിൽ പ്രവർത്തിക്കുന്ന പടക്കനിർമാണശാലയ്ക്കെതിരെയാണ് കേസ്. ലൈസൻസിയായ ബിനോയ് ജേക്കബിനെതിരെയാണ് കേസ് രജിസ്റ്റർ ചെയ്തത്.
തിരുവമ്പാടിയുടെ പടക്കനിർമാണശാലയിൽ സ്ഫോടനമുണ്ടായതിന് പിന്നാലെയാണ് പാറമേക്കാവിന്റെ പടക്കനിർമാണശാലയിൽ പരിശോധന നടത്തിയത്. തഹസിൽദാർ അടക്കമുള്ള റവന്യൂ ഉദ്യോഗസ്ഥരും പൊലീസും ചേർന്ന് നടത്തിയ പരിശോധനയിലാണ് കണ്ടെത്തൽ. നിലവിൽ പടക്കനിർമാണശാല സീൽ ചെയ്തിട്ടുണ്ട്. കോട്ടയം സ്വദേശിയാണ് ലൈസൻസിയായ ബിനോയ് ജേക്കബ്.
അതേസമയം, മുണ്ടത്തിക്കോട് വെടിക്കെട്ട് ദുരന്തത്തിന്റെ പശ്ചാത്തലത്തിൽ പൂരം നടത്തിപ്പ് തീരുമാനിക്കുന്നതിനുള്ള നിർണായക യോഗം ഇന്ന് ചേരും. രാവിലെ പത്തരയ്ക്ക് കലക്ട്രേറ്റിലാണ് യോഗം ചേരുക. മന്ത്രി വി.എൻ വാസവന്റെ നേതൃത്വത്തിൽ ചേരുന്ന യോഗത്തിൽ പാറമേക്കാവ്, തിരുവമ്പാടി ദേവസ്വങ്ങൾ നിലപാട് അറിയിക്കും. പൂരം ആചാരമായി നടത്തണമെന്നാണ് തിരുവമ്പാടി ദേവസ്വത്തിന്റെ നിലപാട്.