സൗദി ലോകകപ്പ് ഒരുക്കങ്ങൾ തകൃതിയിൽ; ഖിദ്ദിയ സ്റ്റേഡിയത്തിനായി 1.15 ബില്യൺ റിയാലിന്റെ മെഗാ കരാർ

റിയാദ്: 2034ലെ ഫിഫ ലോകകപ്പിനായി സൗദി നിർമിക്കുന്ന ഖിദ്ദിയ പ്രിൻസ് മുഹമ്മദ് ബിൻ സൽമാൻ സ്റ്റേഡിയത്തിന്റെ പ്രധാന നിർമാണ കരാർ സൗദി-ചൈനീസ് കൺസോർഷ്യത്തിന് ലഭിച്ചു. 1.15 ബില്യൺ റിയാൽ അഥവാ 30.6 കോടി ഡോളർ മൂല്യമുള്ളതാണ് ഈ മെഗാ പദ്ധതി. സ്റ്റേഡിയത്തിന് പുറംമോടിയും സുരക്ഷയും നൽകുന്ന അത്യാധുനിക ഗ്ലാസ് പുറംചുവരുകളുടെ രൂപകൽപ്പനയും നിർമാണവുമാണ് ഇതിലൂടെ നടപ്പിലാക്കുന്നത്. ചൈന ഫാങ്ഡ ഗ്രൂപ്പിന്റെ അനുബന്ധ സ്ഥാപനമായ ശിഹുയി ഇന്റർനാഷണൽ ഹോൾഡിങ്സും സൗദിയിലെ ഇസാം കബ്ബാനി ആൻഡ് പാർട്ണേഴ്സും ചേർന്ന സംയുക്ത സംരംഭമാണ് ഈ വൻ കരാർ നേടിയെടുത്തത്.

ഈ സംയുക്ത സംരംഭത്തിൽ ചൈന ഫാങ്ഡ ഗ്രൂപ്പിന് 51 ശതമാനവും സൗദി കമ്പനിക്ക് 49 ശതമാനവും ഓഹരി പങ്കാളിത്തമാണുള്ളത്. പദ്ധതിയുടെ മുഖ്യ നിർമാണ ചുമതലയുള്ള സ്പാനിഷ് കമ്പനി എഫ്.സി.സി കൺസ്ട്രക്ഷനും സൗദിയിലെ നെസ്മ ആൻഡ് പാർട്ണേഴ്സും ചേർന്ന 'അപ്ടൗൺ സ്റ്റേഡിയം കൺസ്ട്രക്ഷൻ' സംയുക്ത സംരംഭമാണ് ഈ കരാർ ഒപ്പുവെച്ചത്. പ്രധാന സ്റ്റേഡിയം കൂടാതെ മ്യൂസിയം, മറ്റ് അനുബന്ധ കെട്ടിടങ്ങൾ എന്നിവയും ഈ കരാറിന്റെ പരിധിയിൽ വരുന്നുണ്ട്.

സൗദിയുടെ കിരീടാവകാശിയുടെ പേരിൽ നിർമിക്കുന്ന ഈ സ്റ്റേഡിയത്തിന് 45,000 കാണികളെ ഒരേസമയം ഉൾക്കൊള്ളാൻ സാധിക്കും. പ്രകൃതിഭംഗി നിറഞ്ഞ തുവൈഖ് കുന്നിൻനിരകളുടെ മനോഹരമായ കാഴ്ച സ്റ്റേഡിയത്തിനുള്ളിൽ നിന്ന് ആസ്വദിക്കാൻ കഴിയുന്ന വിധത്തിലാണ് ഇതിന്റെ വാസ്തുവിദ്യ ഒരുക്കിയിരിക്കുന്നത്. എന്നാൽ, കുന്നിൻമുകളിലെ നിർമാണം വലിയ സാങ്കേതിക വെല്ലുവിളികളും ഉയർത്തുന്നുണ്ട്. അവിടുത്തെ ശക്തമായ കാറ്റ്, കൊടും ചൂട്, പൊടിക്കാറ്റ് എന്നിവയെ നേരിടാൻ ശേഷിയുള്ള കരുത്തുറ്റ സാമഗ്രികളാണ് ഇതിനായി ഉപയോഗിക്കുന്നത്. അതുകൊണ്ട് തന്നെ സൗദി അറേബ്യ നിഷ്‌കർഷിക്കുന്ന ഉയർന്ന ഗുണനിലവാര മാനദണ്ഡങ്ങൾ പാലിച്ചാണ് മുഴുവൻ നിർമാണ പ്രവർത്തനങ്ങളും മുന്നോട്ടുപോകുന്നത്.

2034 ലോകകപ്പ് ഫുട്ബോളിനായി സൗദി തയ്യാറാക്കുന്ന 15 അത്യാധുനിക സ്റ്റേഡിയങ്ങളിൽ ഏറ്റവും പ്രധാനപ്പെട്ട ഒന്നാണിത്. റിയാദ്, ജിദ്ദ, അൽ ഖോബാർ, അബഹ, നിയോം എന്നീ അഞ്ച് നഗരങ്ങളിലായാണ് മറ്റ് ലോകകപ്പ് വേദികൾ ഒരുങ്ങുന്നത്. ഖിദ്ദിയ സ്റ്റേഡിയത്തിലെ എയർകണ്ടീഷൻ, സുരക്ഷാ സംവിധാനങ്ങൾ എന്നിവയ്ക്കായി സെപ്റ്റംബറിൽ 82.9 കോടി റിയാലിന്റെ മറ്റൊരു പ്രധാന കരാറും നൽകിയിരുന്നു. വിഷൻ 2030 പദ്ധതിയിലൂടെ സമ്പദ്വ്യവസ്ഥ വൈവിധ്യവത്കരിക്കാനുള്ള സൗദിയുടെ ശ്രമങ്ങൾക്ക് ഈ നിർമാണ പ്രവർത്തനങ്ങൾ വലിയ കരുത്താണ് പകരുന്നത്. കായിക മേഖലയെ ഉന്നതിയിലെത്തിക്കാനും അന്താരാഷ്ട്ര ടൂറിസം സാധ്യതകൾ വികസിപ്പിക്കാനും ഇത്തരം വൻകിട പദ്ധതികൾ ഏറെ സഹായകരമാകും.