ഇവർ കൊച്ചുകുട്ടികൾ; യുനൈറ്റഡ് താരങ്ങൾക്കെതിരെ വെയ്ൻ റൂണി. യുനൈറ്റഡ് ഡ്രസിങ് റൂം കൂടുതൽ തകർച്ചയിലേക്ക്

മാഞ്ചസ്റ്റർ: കോമോയ്‌ക്കെതിരായ മത്സരത്തിൽ യുനൈറ്റഡ് താരങ്ങൾ കാഴ്ചവെച്ച പ്രകടനം കണ്ട് ഞെട്ടിപ്പോയെന്ന് ക്ലബ്ബിന്റെ മുൻ സ്‌ട്രൈക്കർ വെയ്ൻ റൂണി. വിശ്വസിക്കാനാകാത്ത കളിയായിരുന്നു അതെന്നും, ഓൾഡ് ട്രാഫോർഡിലെ ഇപ്പോഴത്തെ അവസ്ഥയിൽ വർഷങ്ങൾക്കിടെ ഇത്രയും ആശങ്ക തോന്നിയിട്ടില്ലെന്നും റൂണി തുറന്നടിച്ചു. ടീമിലെ താരങ്ങളെ 'സ്വാർഥർ' എന്നും 'കൊച്ചുകുട്ടികൾ' എന്നും വിശേഷിപ്പിച്ച മുൻ ഇംഗ്ലണ്ട്, യുനൈറ്റഡ് നായകൻ, പരിശീലകൻ മൈക്കൽ കാരിക്കിനെതിരെ ഉയരുന്ന ചോദ്യങ്ങളെ മനസ്സിലാക്കുന്നുണ്ടെങ്കിലും, പ്രശ്നത്തിന്റെ വേര് താരങ്ങളുടെ മനോഭാവത്തിലാണെന്നും വ്യക്തമാക്കി. കാരിക്ക് തന്റെ അടുത്ത സുഹൃത്താണെന്നും റൂണി പറഞ്ഞു.

മാർട്ടിനെസിന്റെയും ബ്രൂണോ ഫെർണാണ്ടസിന്റെയും വിവാദ പ്രതികരണങ്ങൾക്ക് പിന്നാലെയാണ് റൂണിയുടെ രൂക്ഷ വിമർശനം. 'യുനൈറ്റഡ് സ്റ്റാൻഡ്' പോഡ്കാസ്റ്റിലായിരുന്നു പ്രതികരണം. മാർട്ടിനെസ് പരസ്യമായി സംസാരിച്ചപ്പോൾത്തന്നെ ഇത് വലിയ ദുരന്തമാകുമെന്ന് താൻ പറഞ്ഞിരുന്നെന്ന് റൂണി ഓർമിപ്പിച്ചു. ഡ്രസിങ് റൂമിനെ ഇത് തകർത്തുകളയും. അതിന്റെ തുടക്കമായിരുന്നു അത്. ഇപ്പോൾ ബ്രൂണോയിലും അതാണ് കാണുന്നത്. ഇനി കൂടുതൽ താരങ്ങളിൽനിന്ന് ഇത് കാണേണ്ടിവരും, കാരണം ആർക്കും ഉത്തരവാദിത്തം ഏറ്റെടുക്കാൻ താൽപര്യമില്ല, റൂണി പറഞ്ഞു.

ബ്രൂണോ പറഞ്ഞത് ശരിയാണോ തെറ്റാണോ എന്നത് വേറെ കാര്യമാണെന്നും, കളത്തിലെ ഉത്തരവാദിത്തം ഒരു സംഘമായി ഏറ്റെടുക്കണമെന്നുമാണ് റൂണിയുടെ നിലപാട്. 'ഈ താരങ്ങൾ സ്വാർഥരാണ്. സഹതാരങ്ങളെയോ മാനേജരെയോ സ്റ്റാഫിനെയോ ആരാധകരെയോ അവർക്ക് പരിഗണനയില്ല, സ്വന്തം കാര്യം മാത്രമാണ് അവർക്ക് പ്രധാനം. കാര്യങ്ങൾ അവർക്ക് ഇഷ്ടമുള്ളതുപോലെ നടന്നില്ലെങ്കിൽ കൊച്ചുകുട്ടികളെപ്പോലെ കളിപ്പാട്ടം വലിച്ചെറിഞ്ഞ് കുറ്റം മറ്റുള്ളവരുടെ തലയിൽ വെക്കും,' റൂണി തുറന്നടിച്ചു.

കഴിഞ്ഞ സീസണിൽ പി.എഫ്.എ, എഫ്.ഡബ്ല്യു.എ പ്ലെയർ ഓഫ് ദ ഇയർ പുരസ്‌കാരങ്ങൾ നേടുകയും ഒരു പ്രീമിയർ ലീഗ് സീസണിലെ ഏറ്റവും കൂടുതൽ അസിസ്റ്റുകളുടെ റെക്കോർഡ് തകർക്കുകയും ചെയ്ത ബ്രൂണോയുടെ ഫോം ഈ സീസണിൽ കുത്തനെ ഇടിഞ്ഞിരുന്നു. ഇതാണ് റൂണിയെ ചൊടിപ്പിച്ചത്. 'സ്വന്തം പ്രകടനത്തെ നേരിടാൻ മടിയുള്ളതുകൊണ്ടാണ് ബ്രൂണോ മറ്റൊരാളുടെ മേൽ സമ്മർദം ചെലുത്തുന്നത്. ബ്രൂണോയും മാർട്ടിനെസും ഉൾപ്പെടെ എല്ലാവരും കണ്ണാടിയിൽ സ്വയം ഒന്ന് നോക്കിയാൽ അവർക്ക് കാണാനാകുന്നത് തങ്ങളെത്തന്നെയായിരിക്കും, അത് പോരാ. ഇതിലും കൂടുതൽ അവർ കാണിക്കണം,' റൂണി പറഞ്ഞു.

കാരിക്കിന്റെ ഭാവിയിൽ യുനൈറ്റഡ് ബോർഡ് വ്യക്തത വരുത്തണമെന്നും റൂണി ആവശ്യപ്പെട്ടു. 2015-16 സീസണിന് ശേഷമുള്ള ക്ലബ്ബിന്റെ ഏറ്റവും മോശം ഫോമിനിടെ കാരിക്കിന്റെ പുറത്താക്കൽ ഏതാണ്ട് ഉറപ്പായെന്ന അഭ്യൂഹങ്ങൾ ശക്തമാണ്. എങ്കിലും ഞായറാഴ്ച ബോൺമൗത്തിനെതിരായ മത്സരത്തിൽ അദ്ദേഹം തന്നെയാകും ടീമിനെ നയിക്കുക. പ്ലിമൗത്തിലും ബർമിങ്ഹാം സിറ്റിയിലും സമാന സാഹചര്യം താൻ നേരിട്ടിട്ടുണ്ടെന്ന് പറഞ്ഞ റൂണി, ഇപ്പോൾ കാരിക്കിന്റെ സ്ഥാനത്താണെങ്കിൽ പൊരുതിക്കയറുമെന്ന് വ്യക്തമാക്കി. 'ഇനി നല്ലവനായി നിൽക്കേണ്ട കാര്യമില്ല. താരങ്ങളെ സംരക്ഷിക്കാൻ ചിലത് ചെയ്യേണ്ടിവരും, പക്ഷേ സ്വന്തം കാര്യത്തിൽ പൊരുതിത്തന്നെ നിൽക്കണം. കാരണം ആ താരങ്ങൾ നിങ്ങളെ വലിച്ചുതാഴെയിടും, ഒടുവിൽ ജോലി പോകുന്നത് നിങ്ങളുടേതായിരിക്കും,' റൂണി പറഞ്ഞു.