ജിസിസി ബീച്ച് ​​ഗെയിംസിന് മസ്കത്തിൽ തുടക്കം

മസ്കത്ത്: മൂന്നാമത് ജിസിസി ബീച്ച് ​​ഗെയിംസിന് ഇന്ന് മസ്കത്തിൽ തുടക്കമായി. ഏപ്രിൽ 11 വരെ നടക്കുന്ന ​ഗെയിംസിൽ ജിസിസിയിലെ ആറ് രാജ്യങ്ങൾ പങ്കെടുക്കും. എട്ട് ഇനങ്ങളിലാണ് മത്സരം. ബ​ഹ്റൈൻ‌, കുവൈത്ത്, ഖത്തർ, സൗദി അറേബ്യ, യുഎഇ, ഒമാൻ എന്നീ ആറ് രാജ്യങ്ങളാണ് ജിസിസി ബീച്ച് ​ഗെയിംസിൽ മാറ്റുരക്കുന്നത്. ബീച്ച് ഫുട്ബോൾ, വോളിബോൾ, ഹാൻഡ്ബോൾ, നീന്തൽ, സെയിലിങ്, ടെന്റ് പെ​​​​ഗ്​ഗിങ്, അത്ലറ്റിക്സ് പാരാ​ഗ്ലൈഡിങ് എന്നിങ്ങനെ എട്ട് കായിക ഇനങ്ങളിലായാണ് മത്സരം നടക്കുന്നത്. ​ഗൾഫ് യുവാക്കൾക്കിടയിൽ കൂടുതൽ ഐക്യവും കായിക സംയോജനവും വളർത്തിയെടുക്കുന്നതാണ് ബീച്ച് ​ഗെയിംസ്. ​ഗെയിംസിൽ അത്ലറ്റുകളുടെ പങ്കാളിത്തം ഇത് തെളിയിക്കുന്നതാണ്. ജിസിസി രാജ്യങ്ങൾക്കിടയിൽ സംയുക്ത കായിക സഹകരണം വർധിപ്പിക്കുന്നതിനും ​ഗെയിംസ് വഴിയൊരുക്കുമെന്ന് സംഘാടകർ പറഞ്ഞു. സയ്യിദ് മാലിക് ബിൻ ഷിഹാബ് അൽ സഈദിന്റെ രക്ഷാകർത്വത്തിൽ ഖുറം നാച്ചുറൽ പാർക്കിലായിരുന്നു ഉദ്ഘാടന ചടങ്ങ്. ​ഗെയിംസിന് അതിഥേയത്വം വഹിക്കുന്നതിലൂടെ ഒമാന്റെ പ്രാദേശിക കായികരം​ഗത്തിനും പുതു ഊർജം ലഭിക്കും. ഫുട്ബോളും ഹാന്റ് ബോളും സുൽത്താൻ ഖാബൂസ് സ്പോർട് കോംപ്ലക്സിലാണ് നടക്കുക. ബീച്ച് വോളിബോളും അത്ലറ്റിക്സും അൽ അതൈബ ബീച്ചിലും സ്വിമ്മിങ് ദിവേവ് മസ്കത്തിലും നടക്കും. സെയിലിങ് അൽ ഹെയിൽ നോർത്ത് ബീച്ചിലും അരങ്ങേറും.