ലോകകപ്പ് ഫൈനലിൽ കളിക്കളത്തിലെ മാന്ത്രികനായ ലയണൽ മെസ്സിയെയും അർജന്റീനയെയും തടഞ്ഞുനിർത്തുക എന്നത് ഏതൊരു ടീമിനെയും സംബന്ധിച്ച് ഏറ്റവും വലിയ വെല്ലുവിളിയാണ്. എന്നാൽ 2014ലെ ബ്രസീൽ ലോകകപ്പ് ഫൈനലിൽ ജർമനി അത് വിജയകരമായി ചെയ്തു കാണിച്ചു. ഫൈനലിൽ അർജന്റീനയെ നേരിടാനൊരുങ്ങുന്ന സ്പെയിന് എന്ത് തന്ത്രമാണ് സ്വീകരിക്കേണ്ടതെന്ന ചോദ്യത്തിന് ഉത്തരം നൽകുന്നത് 12 വർഷം മുമ്പ് ജർമൻ പരിശീലകൻ ജോകിം ലോയും സഹപരിശീലകൻ ഹാൻസി ഫ്ലിക്കും ചേർന്ന് നടപ്പിലാക്കിയ ആ കൃത്യമായ പ്രതിരോധ മാതൃകയാണ്.
മെസ്സിയെ നേരിടാൻ സാധാരണയായി പല ടീമുകളും ചെയ്യുന്നതുപോലെ ഒരു കളിക്കാരനെ മാത്രം 'മാൻ-മാർക്ക്' ചെയ്യാൻ ജർമനി അന്ന് തയ്യാറായില്ല. മെസ്സിയോളം പ്രതിഭയുള്ള ഒരു താരത്തെ ഒരാൾക്ക് മാത്രം തടയാൻ കഴിയില്ലെന്ന് ജർമനിക്ക് കൃത്യമായി അറിയാമായിരുന്നു. അതിനാൽ കളിക്കളത്തിൽ എവിടെ മെസ്സിക്ക് പന്ത് ലഭിച്ചാലും രണ്ടോ മൂന്നോ ജർമൻ കളിക്കാർ ചേർന്ന് അദ്ദേഹത്തെ വളയുന്ന 'കൂട്ടായ പ്രതിരോധം' എന്ന തന്ത്രമാണ് അവർ പരീക്ഷിച്ചത്. ബെനഡിക്റ്റ് ഹൗവെഡെസ്, മാറ്റ്സ് ഹമ്മൽസ് എന്നിവരുടെ നേതൃത്വത്തിലുള്ള പ്രതിരോധനിര കൃത്യമായ കൂട്ടായ്മയിലൂടെ മെസ്സിക്ക് വൺ-ഓൺ-വൺ അവസരങ്ങൾ നിഷേധിച്ചു.
ഇടങ്ങൾ നിഷേധിക്കുന്ന കോംപാക്റ്റ് ശൈലി
മെസ്സിക്ക് പന്തുമായി ഓടിക്കയറാനുള്ള ഇടങ്ങൾ കളിക്കളത്തിൽ ഇല്ലാതാക്കുക എന്നതായിരുന്നു ജർമനിയുടെ പ്രധാന ആയുധം. പ്രതിരോധനിരയും മധ്യനിരയും തമ്മിലുള്ള അകലം വളരെ കുറച്ച്, കളിക്കളത്തിന്റെ മധ്യഭാഗത്ത് അവർ ശക്തമായ ഒരു പ്രതിരോധ മതിലൊരുക്കി. പെനാൽറ്റി ബോക്സിന് മുന്നിൽ മെസ്സിക്ക് ഏറ്റവും അപകടകരാമായി മാറാൻ സാധിക്കുന്ന 'സോൺ 14' എന്ന ഏരിയ പൂർണമായും ജർമനി അടച്ചുപൂട്ടി. ഇത് മെസ്സിയെ പലപ്പോഴും പന്ത് ലഭിക്കാനായി സ്വന്തം ഹാഫിലേക്ക് പിൻവാങ്ങാൻ നിർബന്ധിതനാക്കി.
സഹതാരങ്ങളിലേക്കുള്ള വഴികൾ അടയ്ക്കുക
മെസ്സി ഒറ്റയ്ക്ക് ഗോളടിക്കുന്നതിനേക്കാൾ അപകടകരം അദ്ദേഹം സഹതാരങ്ങൾക്ക് നൽകുന്ന കൃത്യതയുള്ള പാസുകളാണ്. ഇത് മനസിലാക്കി മെസ്സിയിൽ നിന്ന് ഗോൺസാലോ ഹിഗ്വെയ്നിലേക്കും മറ്റ് മുന്നേറ്റനിര താരങ്ങളിലേക്കുമുള്ള പാസിങ് വഴികൾ ജർമൻ മധ്യനിര കൃത്യമായി വിച്ഛേദിച്ചു. പന്ത് ലഭിക്കുമ്പോൾ ചിന്തിക്കാനോ പാസ് ചെയ്യാനോ സമയം നൽകാതെ ശക്തമായ സമ്മർദ്ദം ചെലുത്തിയതോടെ അർജന്റീനയുടെ താളം തെറ്റി. ഒടുവിൽ അധികസമയത്ത് മരിയോ ഗോഡ്സെ നേടിയ ഗോളിൽ ജർമനി ലോകകിരീടം സ്വന്തമാക്കുകയും ചെയ്തു.
സ്പെയിൻ പഠിക്കേണ്ട പാഠം
2014ലെ ഈ ജർമൻ മാതൃക സ്പെയിനിന്റെ നിലവിലെ കളിശൈലിക്ക് ഏറ്റവും അനുയോജ്യമായ ഒന്നാണ്. ലൂയിസ് ഡി ലാ ഫ്യുയെന്തെയുടെ കീഴിലുള്ള സ്പെയിൻ പന്ത് കൈവശം വെച്ചും, എതിരാളികളുടെ ഹാഫിൽ വെച്ച് തന്നെ ശക്തമായി പ്രസ് ചെയ്തും കളിക്കുന്ന ടീമാണ്. ഫൈനലിൽ മെസ്സിയെ തടയാൻ ഒരു പ്രത്യേക താരത്തെ ചുമതലപ്പെടുത്തുന്നതിന് പകരം, ജർമനി കാണിച്ചുതന്നതുപോലെ ടീം ഒന്നടങ്കം പ്രതിരോധിക്കുകയും കളിക്കളത്തിലെ ഇടങ്ങൾ ഇല്ലാതാക്കുകയും ചെയ്താൽ സ്പെയിന് അർജന്റീനയുടെ വലിയൊരു ഭീഷണിയെ മറികടക്കാൻ സാധിക്കും.