ന്യൂഡൽഹി: മമത ബാനർജിക്കെതിരെ കേസ് എടുക്കാൻ സുപ്രീം കോടതിയെ സമീപിച്ച് ഇഡി. ഡിജിപി, കൊൽക്കത്ത പൊലീസ് ഉദ്യോഗസ്ഥർ എന്നിവർക്കെതിരെയും എഫ്ഐആർ രജിസ്റ്റർ ചെയ്യണമെന്ന് ഇഡി. അന്വേഷണം തടസപ്പെടുത്തൾ, തെളിവുകൾ നശിപ്പിക്കൽ എന്നിവയിൽ കേസ് എടുക്കണമെന്നാണ് ആവശ്യം.
പശ്ചിമ ബംഗാൾ മുഖ്യമന്ത്രി മമത ബാനർജിയും സംസ്ഥാന സർക്കാർ ഉദ്യോഗസ്ഥരും കൺസൾട്ടൻസി സ്ഥാപനമായ ഐ-പാക്കിന്റെയും അതിന്റെ സഹസ്ഥാപകനായ പ്രതീക് ജെയിനിന്റെയും കൊൽക്കത്ത ഓഫീസുകളിൽ നടത്തിയ അന്വേഷണത്തിലും പരിശോധനയിലും ഇടപെട്ടുവെന്ന് ആരോപിച്ചാണ് ഹരജി. അന്വേഷണവുമായി ബന്ധപ്പെട്ട നിർണായകമായ രേഖകൾ, ഇലക്ട്രോണിക് ഉപകരണങ്ങൾ എന്നിവ നീക്കം ചെയ്യുന്നതിലേക്ക് ഈ ഇടപെടൽ കലാശിച്ചുവെന്നും നിയമപ്രകാരം ചുമതലകൾ നിർവഹിക്കുന്നതിൽ നിന്ന് തടഞ്ഞുവെന്നും ഏജൻസി അവകാശപ്പെട്ടു. കോടതി ഇതുവരെ കേസ് പരിഗണിച്ചിട്ടില്ല.
രാഷ്ട്രീയ കൺസൾട്ടൻസി സ്ഥാപനമായ ഐ-പിഎസി മുമ്പ് തൃണമൂൽ കോൺഗ്രസുമായി ചേർന്ന് പ്രവർത്തിച്ചിട്ടുണ്ട്. 2021ലെ പശ്ചിമ ബംഗാൾ നിയമസഭാ തെരഞ്ഞെടുപ്പിലും തുടർന്നുള്ള തെരഞ്ഞെടുപ്പുകളിലും പങ്കാളിയായിരുന്നു. ഇഡി നടപടി രാഷ്ട്രീയ പ്രേരിതമാണെന്ന് ആരോപിച്ച് മുഖ്യമന്ത്രി മമതാ ബാനർജി രംഗത്തെത്തി. ഈ വിഷയത്തിൽ കൊൽക്കത്ത ഹൈക്കോടതിയിൽ രണ്ട് ക്രോസ്-പെറ്റീഷനുകൾ ഫയൽ ചെയ്തിരുന്നു. മമത ബാനർജിക്കെതിരെ സിബിഐ അന്വേഷണം വേണമെന്നും ഇഡി ആവശ്യപ്പെട്ടിരുന്നു.
തെരഞ്ഞെടുപ്പ് പടിവാതിൽക്കൽ എത്തിനിൽക്കെ ബംഗാളിൽ കേന്ദ്ര അന്വേഷണ ഏജൻസികളുടെ ഇടപെടലിനെ ചൊല്ലി തൃണമൂൽ കോൺഗ്രസ്-ബിജെപി പോര് കനക്കുകയാണ്. ഐപാക്ക് ഓഫീസിൽ ഇഡി നടത്തിയ റെയ്ഡ് ബിജെപിക്കെതിരായ പ്രചാരണ ആയുധമാക്കുകയാണ് മമതാ ബാനർജി. ബിജെപി സംസ്ഥാന നേതൃത്വത്തിന്റെ നിർദ്ദേശപ്രകാരമാണ് ഡൽഹിയിൽ അമിത് ഷാ കാര്യങ്ങൾ തീരുമാനിക്കുന്നതെന്ന് മമതാ ബാനർജി കുറ്റപ്പെടുത്തി. വരും ദിവസങ്ങളിൽ സംസ്ഥാന വ്യാപകമായി ബിജെപിക്കും കേന്ദ്ര ഏജൻസികൾക്കും എതിരായ ക്യാമ്പയിൻ ആരംഭിക്കുമെന്ന് നേതാക്കൾ പറഞ്ഞു.
പ്രതിപക്ഷ സംസ്ഥാനങ്ങളിലെ ഇഡി നടപടിക്കെതിരെ വിമർശനങ്ങളും ശക്തമാവുകയാണ്. മോദി സർക്കാരിൻ്റെ ദൈവമാണ് ഇഡിയെന്ന് മുതിർന്ന അഭിഭാഷകൻ കപിൽ സിബൽ കുറ്റപ്പെടുത്തി. മമത ബാനർജിയുടെ തിരഞ്ഞെടുപ്പ് തന്ത്രങ്ങൾ രൂപപ്പെടുത്തുന്ന സംഘത്തിലെ പ്രധാന അംഗമായ പ്രതീക് ജെയിനിന്റെ വസതിയിലും സാൾട്ട് ലേക്ക് സെക്ടർ അഞ്ചിലുള്ള ഗോദ്റെജ് വാട്ടർസൈഡ് കെട്ടിടത്തിലെ കമ്പനിയുടെ ഓഫീസിലുമാണ് ഇഡി റെയ്ഡ് നടത്തിയത്. റെയ്ഡുകളെക്കുറിച്ചുള്ള വാർത്തകൾ പുറത്ത് വന്നതോടെ ടിഎംസി നേതാക്കൾ സാൾട്ട് ലേക്ക് ഓഫീസിന് പുറത്ത് പ്രതിഷേധിച്ചിരുന്നു